“အဓိကက စစ်မှုထမ်းအခေါ်မခံရဖို့ပဲဆိုတော့ အားလုံးအမှန်တော့မဖြေဘူး”

တနင်္သာရီအပါအဝင် တစ်နိုင်ငံလုံးမှာ စစ်ကောင်စီက သန်းခေါင်စာရင်းတွေကောက်ယူနေပါတယ်။ စစ်ကောင်စီတပ်တွေထိန်းချုပ်ထားနိုင်တဲ့ နေရာတွေမှာ အဓိကကောက်ယူနေတာဖြစ်ပြီး တော်လှန်ရေးတပ်တွေအားကောင်းတဲ့ဒေသတွေမှာတော့ ကောက်ယူတာမျိုးမရှိသေးပါဘူး။

သန်းခေါင်စာရင်းကောက်တဲ့အချိန်မှာ ကိုယ်ရေးကိုယ်တာအချက်အလက်၊ ပညာရေး၊ ပြည်ပထွက်ခွာသူတွေနဲ့ မိသားစုပိုင်ဆိုင်မှုတွေအကြောင်း စတာတွေကို မေးမြန်းကောက်ခံတာတွေရှိနေပါတယ်။ သန်းခေါင်စာရင်းကောက်ယူတာနဲ့ပတ်သက်ပြီး ပြည်သူတွေအကြားမှာစိုးရိမ်တာတွေလည်းရှိနေပါတယ်။ ဒီတစ်ပတ်တောင်ပိုင်းသားအသံအစီအစဥ်မှာတော့ သန်းခေါင်စာရင်းနဲ့ပတ်သက်ပြီး တနင်္သာရီတိုင်းက ဒေသခံတချို့ရဲ့ သဘောထား၊ အမြင်တွေကို စုစည်းဖော်ပြလိုက်ပါတယ်။

(တောင်ပိုင်းသားတို့အသံ)

▪️ထားဝယ်မြို့ခံ လူငယ်အမျိုးသားတစ်ဦး

မေး - အိမ်မှာ သန်းခေါင်စာရင်းလာကောက်သွားပြီးလား။
ဖြေ - ၃ ရက်နေ့ကလာကောက်သွားပြီ။

မေး - ဘယ်သူတွေလာကောက်တာလဲ။ သူတို့ရဲ့ပုံစံတွေက ဘယ်လိုရှိလဲ။
ဖြေ - ကျောင်းဆရာမယူနီဖောင်းနဲ့ တစ်ယောက်ပဲ အိမ်ထဲဝင်လာတယ်။ ရွာလူကြီးတွေ ရဲတွေကတော့ အိမ်အပြင်မှာ ရှိနေတယ်။ မော်တော်ပီကယ်တွေ တခြားအရပ်ဝတ်နဲ့ အစုံပဲ ၂၀ လောက်ရှိတယ်။ လမ်းထိပ်မှာစောင့်နေတာလည်းရှိတယ်။

မေး - သူတို့သတ်မှတ်ထားတဲ့မေးခွန်းအပြင် တခြားမေးခွန်းတွေမေးတာရှိသေးလား။
ဖြေ - မေးခွန်းအားလုံးတောင်မပြည့်ဘူး။ သူတို့လိုချင်တာ အရေးကြီးတာတွေပဲမေးတယ်။ အိမ်မှာ အမှန်တကယ်နေတဲ့သူတွေပဲ မေးတယ်။ မိသားစုဘယ်နှယောက်၊ သားသမီးဘယ်နှယောက်။ အိမ်သာက ဘိုထိုင်လား ဘာလားလောက်ပဲ။

မေး - သန်းခေါင်စာရင်းကောက်နေတဲ့အချိန်မှာ ဘာတွေစိုးရိမ်မိလဲ။
ဖြေ - သန်းခေါင်စာရင်းအကြောင်းပြပြီး စစ်မှုထမ်းခေါ်မှာစိတ်ပူတယ်။ အိမ်ထဲစဝင်ဝင်ချင်း အိမ်ရဲ့လိုကေးရှင်းကို လက်ပ်တော့နဲ့ယူပြီးဆော့ဝဲလ်တစ်ခုထဲဖြည့်တယ်။ အဲအချက်အလက်တွေကို နေပြည်တော်ကို တိုက်ရိုက်ရောက်ဖို့များတယ်။ အိမ်လိုကေးရှင်းလည်းရထားပြီ အသက်အရွယ်နဲ့လူစာရင်းလည်း ရှိထားပြီတော့ လွယ်လွယ်လေးပဲပေါ့။ သူတို့ဘက်က သန်းခေါင်စာရင်းတိတိကျကျလိုတာမဟုတ်ဘူးလေ။ အိမ်လိုကေးရှင်းနဲ့ ဒီအိမ်မှာ အရွယ်ရောက်ပြီးသားလူဦးရေ ဘယ်လောက်ယောက်ရှိတယ်ဆိုတာပဲလိုတာ။ သူတို့ရည်ရွယ်ချက်က ပေါ်နေတာပဲ။

မေး - အိမ်မှာမရှိတဲ့သူတွေနဲ့ပတ်သက်ပြီးရော သူတို့ဘာတွေမေးသေးလဲ။
ဖြေ - နိုင်ငံခြားသွားတဲ့သူရှိလားမေးတော့ မရှိဘူးလို့ပြောလိုက်တယ်။ တကယ်နေတဲ့သူပဲပြောပေးလို့ပြောတယ်။ ပြည်ပထွက်တဲ့ သူမပြောလည်းရတယ်တဲ့။ ဒါက စစ်မှုထမ်းဖို့အတွက် ကောက်တယ်ဆိုတာ သေချာတယ်။

မေး - ကိုယ့်အိမ်ကအချက်အလက်တွေကိုပါသွားပြီဆိုတော့ သူတို့ဘက်က ဘာတွေလုပ်လာနိုင်တယ်ထင်လဲ။
ဖြေ - စစ်မှုထမ်းဖို့လိုလာရင် အသက်နဲ့တိုက်ရိုက်လာလို့ရပြီပေါ့။ အရင်ကတော့ အိမ်ရဲ့လိုကေးရှင်းမရှိသေးဘူးဆိုတော့ လဝက ကနေ တဆင့်ခေါ်ရတယ်။ ပြီးတော့ ရွာလူကြီး အဆင့်ဆင့် သွားရတယ်ပေါ့။ အခုဆို တိုက်ရိုက်လာလို့ ရပြီ။ ဘယ်သူတွေလာမှာလဲတော့မပြောတတ်ဘူး။ သေချာတာတော့ အဆင့်ဆင့်မသွားရတော့ဘူး။

မေး - မေးခွန်းအားလုံးအမှန်တိုင်းဖြေလိုက်လား။
ဖြေ - မဖြေပါဘူး။ အမှန်တိုင်းမဖြေလို့ရတဲ့ အဖြေမျိုးဆိုလိမ်လိုက်တယ်။ အဓိကက စစ်မှုထမ်းအခေါ်မခံရဖို့ပဲဆိုတော့ အားလုံးအမှန်တော့မဖြေဘူး။

▪️သရက်ချောင်းမြို့ခံ အိမ်‌ထောင်ရှင်အမျိုးသမီးတစ်ဦး

မေး - အိမ်မှာသန်းခေါင်စာရင်းလာကောက်သွားပြီလား။
ဖြေ - လာမကောက်သေးဘူး။

မေး - သန်းခေါင်စာရင်းကောက်တာနဲ့ပတ်သက်ပြီး ဘာတွေစိုးရိမ်နေတာရှိလဲ။
ဖြေ - အသက်ပြည့်ပြီးတဲ့ သားတစ်ယောက်ရှိတာ သူ့ကိုပဲ စိတ်ပူနေတယ်။ ပြည့်ပြီးဆို ၁၉ နှစ်ပဲရှိသေးတာ။ သူ့အကြောင်းစာရင်းထဲထည့်လိုက်ရင် စစ်မှုထမ်းခေါ်ခံရမှာစိတ်ပူနေတယ်။ ပြီးတော့ ပိုင်ဆိုင်မှုတွေလည်းမေးတယ်ဆို။ အိမ်တွေလာသိမ်း ပစ္စည်းတွေသိမ်းသွားမှာလည်း ပူနေရတယ်။

မေး - တခြားရပ်ကွက်တွေမှာ ဘယ်လိုပုံစံနဲ့ ကောက်နေတယ်ကြားမိလဲ။
ဖြေ - အိမ်တိုင်းမှာ လိုက်မကောက်တော့ဘဲ အိမ်တစ်အိမ်မှာ လူစုပြီး မေးတာတွေလည်း ရှိနေတယ်ပြောတယ်။ တချို့နေရာမှာဆို လူတောင်မစုတော့ဘဲ အိမ်တစ်အိမ်တည်းကိုပဲ ဘေးအိမ်တွေအကြောင်းပတ်မေးသွားတာတဲ့။ တို့အိမ်မှာတော့ ဘယ်လိုလာမလဲမသိသေးဘူး။

မေး - မေးခွန်းအားလုံးအမှန်အတိုင်းဖြေဖို့စီစဉ်ထားလား။
ဖြေ - ဘယ်လိုပြောရမလဲ အခုတော့ အမှန်အတိုင်းမဖြေလိုက်ပေမယ့် နောက်တစ်ခုခုကြောင့် အိမ်ရောက်လာရင် လိမ်ထားတာပေါ်မှာစိတ်ပူတာပေါ့။ တခြားအိမ်တွေမှာ လိုက်ဖြေရမယ်ဆို တခါလိမ်လို့မရပြန်ဘူး။ ကိုယ့်အိမ်မှာတိုက်ရိုက်လာမေးရင်တော့ ကြည့်ဖြေဖြစ်မယ်ထင်တယ်။

မေး - ကိုယ့်အိမ်ကအချက်အလက်တွေကိုပါသွားရင် သူတို့ဘက်က ဘာတွေလုပ်လာနိုင်တယ်ထင်လဲ။
ဖြေ - သူတို့လိုလာရင် စစ်မှုထမ်းဖို့ ခေါ်မယ်ထင်တယ်။ ပစ္စည်းတွေကို ပြည်သူပိုင်တို့ သိမ်းလာတာလည်းရှိချင်ရှိလာမှာ။

▪️ရေဖြူမြို့နယ် ကံပေါက်ကျေးရွာအုပ်စုက အသက် ၄၅ နှစ်ဝန်းကျင်အရွယ် အမျိုးသားတစ်ဦး

မေး - အိမ်မှာသန်းခေါင်စာရင်းလာကောက်သွားပြီလား။
ဖြေ - လာမကောက်သေးဘူး။

မေး - သန်းခေါင်စာရင်းကောက်တာနဲ့ပတ်သက်ပြီး ဘာတွေစိုးရိမ်နေတာရှိလဲ။
ဖြေ - စာရင်းလာကောက်ရင်မစိုးရိမ်ပါဘူး။ မေးခွန်းတိုင်းကို အနီးစပ်ဆုံးဖြေပေးမှာပါ။

မေး - တခြားရပ်ကွက်တွေမှာ ဘယ်လိုပုံစံနဲ့ ကောက်နေတယ်ကြားမိလဲ။
ဖြေ - အိမ်တွေမှာမေးသူတွေက တစ်ယောက်နှစ်ယောက်လောက်ပဲဝင်ရောက်မေးပါတယ်တဲ့။ စစ်တပ်တွေကလမ်းဆုံ လမ်းခွတွေမှာစောင့်ကြပါတယ်။ လမ်းတွေပေါ်မှာကားနဲ့ပတ်နေတာလည်းရှိပါတယ်။

မေး - မေးခွန်းအားလုံးအမှန်အတိုင်းဖြေဖို့စီစဉ်ထားလား။
ဖြေ - သန်းခေါင်စာရင်းက ရေရှည်အတွက် အသုံးဝင်အသုံးတည့်မှာဆိုတော့ အချက်အလက်အားလုံးကို တတ်နိုင်သလောက်တော့ အမှန်တိုင်းဖြေပေးမှာပါ။ ဒါပေမယ့် မေးပုံမေးနည်းနဲ့ မေးခွန်းအကြောင်းအရာပေါ်မူတည်ပြီး သင့်တင့်လျှောက်ပတ်အောင်တော့ဖြေရပါမယ်။

မေး - ကိုယ့်အိမ်ကအချက်အလက်တွေကိုပါသွားရင် သူတို့ဘက်က ဘာတွေလုပ်လာနိုင်တယ်ထင်လဲ။
ဖြေ - အချက်အလက်တွေကိုကြည့်ပြီး စစ်မှုထမ်းလို စစ်မှုထမ်း၊ ပြည်သူ့စစ်လို ပြည်သူ့စစ် စသဖြင့် ဆွဲထည့်မယ်ထင်ပါတယ်။ မလုပ်မနေရဆိုတာမျိုးတွေကြပ်လာမယ် မိသားစုကိုခြိမ်းခြောက်မယ် ဒါတွေရှိလာနိုင်တာပေါ့။

▪️တနင်္သာရီမြို့နယ်၊ ညောင်ပင်ကွင်းကျေးရွာအုပ်စုက အိမ်ထောင်ရှင်အမျိုးသားတစ်ဦး

မေး - ရွာမှာသန်းခေါင်စာရင်းလာကောက်သွားပြီလား။
ဖြေ - လာမကောက်သေးပါဘူး။

မေး - ရွာကိုသန်းခေါင်စာရင်းလာကောက်မယ်ထင်လား။ လာဖို့ရောလွယ်လား။
ဖြေ - ကျနော်တို့ရွာဘက်တော့ ရောက်လာမယ်မထင်ပါဘူး။ ဘာဖြစ်လို့လဲဆိုတော့ သူတို့ဟာနဲ့သူတို့တောင်မှာ တပ်တွင်းကနေ တပ်ပြင်ထွက်လို့မရတဲ့အနေအထားဆိုတော့ သန်းခေါင်စာရင်းလာကောက်ဖို့ မလွယ်လောက်ဘူးထင်တာပဲ။ တကယ်လို့ ကောက်လာရင်လည်း မီးစင်ကြည့်ကရမှာပေါ့ဗျာ။

မေး - သန်းခေါင်စာရင်းကောက်တာနဲ့ပတ်သက်ပြီး ဘာတွေစိုးရိမ်နေတာရှိလဲ။
ဖြေ - ရင်ထဲမှာရှိတိုင်းပြောရမယ်ဆိုရင်တော့ အချက်အလက်တွေမပေးချင်ဘူး။ ကိုယ့်အိမ်မှာ ဘာရှိတယ်ဘာမရှိဘူး မိသားစုဘယ်လောက်ယောက်ရှိတယ် ဆိုင်ကယ်ဘယ်နှစီးရှိတယ်၊ ပိုင်ဆိုင်မှုဘယ်လောက်ရှိတယ်ဘာညာအဲဒါတွေတော့ မပေးချင်ဘူးပေါ့ဗျာ။ ဒါပေမယ့်လည်းပဲ မဖြစ်မနေ အတင်းအကြပ်မေးလာရင်တော့လည်း မီးစင်ကြည့်ကရမှာပေါ့။

မေး - တိုက်ပွဲဖြစ်တဲ့တခြားရွာတွေမှာရော သန်းခေါင်စာရင်းကောက်နေပြီလို့ ကြားမိလား။
ဖြေ - မကြားမိပါဘူး။ ကျနော်ကြားရတဲ့သတင်းတွေအရ စစ်တပ်ထိန်းချုပ်နယ်မြေတွေမှာပဲ ကောက်မယ်လို့ သိထားရတယ်။ လက်ရှိ တနင်္သာရီမြို့ပေါ်မှာတော့ကောက်နေကြပြီ။

မေး - မေးခွန်းအားလုံးအမှန်အတိုင်းဖြေဖို့စီစဉ်ထားလား။
ဖြေ - တကယ်လို့သူတို့ရောက်လာရင်တော့ သံသယတွေမဖြစ်အောင် ပြဿနာတွေမတက်အောင်တော့ ကိုယ်လည်း အန္တရာယ်မဖြစ်အောင် လက်ရှိရှိနေတဲ့အရာတွေကို အကောင်းဆုံးဖြစ်အောင် ကြိုးစားပြီးဖြေဖို့တော့ ရှိတယ်။ အားလုံးအကြောက်တရားနဲ့နေနေရတဲ့ခေတ်မို့လို့ပေါ့ဗျာ။

မေး - ကိုယ့်အိမ်ကအချက်အလက်တွေကိုပါသွားရင် သူတို့ဘက်က ဘာတွေလုပ်လာနိုင်တယ်ထင်လဲ။
ဖြေ - ကြားထားတဲ့စကားအရတော့ သန်းခေါင်စာရင်းကောက်ပြီး ရွေးကောက်ပွဲ ပြန်လုပ်မယ် မဲထည့်ဘာညာလုပ်မယ်ဆိုပြီးသိထားတယ်။ ဒီအတိုင်းဆိုရင်တော့ စိုးရိမ်စရာမရှိဘူး။ ဒါပေမယ့် အချက်အလက်တွေယူပြီး အလွဲသုံးစားလုပ်မယ်ဆိုရင်တော့ စိုးရိမ်စရာရှိတာပေါ့။

The Tanintharyi Times

• လူထုအသံ
• အမြင်