ထိုင်းနိုင်ငံမှာ အဖမ်းခံခဲ့ရတဲ့ ထားဝယ်သား ကိုကျော်နဲ့ အင်တာဗျူး

ထိုင်းမှာ ဖမ်းဆီးခံရ၊ အကျဉ်းကျခံရပြီးနောက် ကော့သောင်းကို ပြန်ပို့ခံရတဲ့ မြန်မာနိုင်ငံသား အရေအတွက်ဟာ အခုနှစ် လေးလအတွင်းမှာ အယောက် တစ်ထောင်နီးပါးရှိခဲ့ပါတယ်။ ဒီလို မျိုးဖြစ်ရပ်တွေ အများအပြားရှိနေပေမဲ့လည်း ပြည်ပကို စွန့်စွန့်စားစား သွားရောက်ပြီး အလုပ်လုပ်ဖို့ ထွက်ခွါနေသူတွေက နေ့စဉ် ရှိနေပြန်ပါတယ်။ သူတို့ဘာကြောင့် ပြန်ထွက်ခွါဖို့ စဉ်းစားကြတာပါလဲ။ ဖမ်းဆီးအကျဉ်းကျချိန်မှာ ကြုံရတာတွေက ဘယ်လို ရှိပါသလဲ။ ထိုင်းနိုင်ငံမှာ အလုပ်လုပ်နေတဲ့ ထားဝယ်ခရိုင်၊ လောင်းလုံးမြို့က အသက် ၂၀ ကျော် အရွယ် ကိုကျော်(အမည်လွဲ) ကို တနင်္သာရီတိုင်းမ်ကနေ မေးမြန်းပြီး တောင်ပိုင်းသားတို့အသံ ကနေ ဖော်ပြလိုက်ပါတယ်။

(တောင်ပိုင်းသားတို့အသံ)

မေး – ဘယ်အချိန်လောက်က အဖမ်းခံခဲ့ရတာလဲ။

ဖြေ – ပြီးခဲ့တဲ့ဖေဖော်ဝါရီလ ၁၆ရက်နေ့ မနက်၁၀ နာရီလောက်ပေါ့။ ကျနော်ရယ်၊ လုပ်ဖော်ကိုင်ဘက်၄ ယောက်ရယ်၊ အလုပ်လုပ်နေတုန်းမှာ ထိုင်းပုလိပ်(ထိုင်းရဲ)တွေဝင်ဖမ်းတာခံလိုက်ရတယ်။

မေး – အဖမ်းခံရတဲ့အချိန်တုန်းကစိတ်ထဲဘယ်လိုခံစားရလဲ။

ဖြေ-ဘယ်လိုပြောရမလဲ၊ အဖမ်းခံရချင်းချင်းတော့ ဝမ်းနည်းတာပေါ့။ တစ်ခါမှလည်းအဖမ်းမခံရဖူးဘူးဆိုတော့ထူပူသွားတာတော့ရှိတယ်။ ​မဟုတ်တာလုပ်ထားတာ မရှိတဲ့အတွက်တော့ ကြောက်စိတ်တော့ မဝင်မိပါဘူး၊၊

မေး – အဖမ်းခံရပြီးတဲ့နောက် ဘာတွေကြုံခဲ့ရလဲ။ မှတ်မိသလောက်ပြောပြပေးပါလား။

ဖြေ – ကျနော်တို့ကို ပုလိပ်တွေကားနဲ့ ခေါ်သွားတယ်။ ရဲစခန်းရောက်တော့ စစ်ဆေးစရာတွေ စစ်ဆေးတယ်။ ဖောင်လည်းဖြည့်ရတယ်။ ပြီးတော့ ကျနော်တို့ကို ဒဏ်​ငွေဆောင်ရမယ်ပြောတယ်။ အခုဒီရဲစခန်းမှာ၁၀ညအိပ်ရမယ်၊ မအိပ်ချင်ရင် ဒဏ်ငွေထိုင်းဘတ်၅၀၀၀ပေးရမယ်ပြောတယ်။ အဲ့ဒီမှာဘတ်၅၀၀၀ကုန်တယ်။ စခန်းကနေ ညနေပိုင်းလောက်မှာ ရနောင်းလဝကရဲ့ထိန်းသိမ်းတဲ့နေရာကိုပို့ပေးတယ်၊၊ လဝကကိုရောက်တော့ ပါလာတဲ့ပစ္စည်းတွေကို သိမ်းဆည်းတယ်။ အဝတ်အစားတစ်စုံတော့ထုတ်ပေးတယ်။ ပုံမှန် အဝတ်အစားပေါ့။

မေး – အပြစ်ဒဏ်က ဘယ်နှနှစ်ကျခံခဲ့ရလဲ။

ဖြေ – ကျနော်တို့ကိုဘယ်လောက်ကျတယ်ဆိုပြီးပြောတာမျိုးတော့မရှိဘူး။ မြန်မာသံရုံးကခေါ်မယ်ဆိုရင်တော့ ပြန်လွှတ်မယ်ပြောတယ်။အထဲကလူတွေမေးကြည့်တော့ ၂လကျတဲ့သူတွေလည်း တွေ့တယ်။ ၁လကျပြီးတဲ့သူတွေလည်း ရှိတယ်ပေါ့၊၊

မေး – ထောင်ထဲမှာ နေရတဲ့အချိန်မှာရော ဘာတွေအခက်အခဲကြုံရတာတွေရှိလဲ။

ဖြေ – ကျနော်တို့အမှုကတော့ တမ္မော(လူဝင်မှုကြီးကြပ်ရေးဥပဒေ)အမှုဆိုတော့ထောင်မကျဘူးလို့တော့ပြောတယ်။ မူးယစ်ဆေးဝါး ဖမ်းမိတာတို့ လူသတ်တာတို့ဆိုရင်တော့ ထောင်ကျတယ်ပေါ့။ နေရထိုင်ရတာတော့နည်းနည်းကျပ်တယ်ပြောရမယ်။ အချုပ်တစ်ခန်းမှာဆို လူ၃၀က အနည်းဆုံးပဲထား ထားတာ။ တစ်ခါတလေဆို ချိုးရေမရတဲ့နေ့တွေတော့ ရှိတယ်။ လူများတော့ သူတို့တင်ထားတဲ့ရေနဲ့ မလောက်ဘူးလေ။ အဲ့အခါမျိုးဆိုရင်တော့ ပင်ပန်းတယ်။ သောက်ရေကတော့ အပြင်ကသူတွေဖြည့်ပေးမှသောက်ရတယ်။ ကုန်ရင်တော့ သူတို့ကိုပြောရတာပေါ့၊၊ ပြီးတော့အပြင်မထွက်ရဘူး။ မနက်ကနေ ညအထိ အခန်းထဲမှာချည်းပဲ တော်တော်တော့ ငြီးငွေ့သွားတယ်၊၊

မေး – အချုပ်ထဲမှာ မြန်မာနိုင်ငံသားတွေရော ဘယ်လောက်လောက်တွေ့ရလဲ။

ဖြေ – ကျနော် မှတ်မိသလောက်ဆို မိန်းကလေးတွေရောဆို ၂၀၀ ကျော်လောက်ရှိမယ်။ အချုပ်က ၅ထပ်ရှိတာမှာ ၄ထပ်က မြန်မာတွေအပြည့်ပဲ၊၊

မေး – အချုပ်ထဲမှာ ဘယ်နှစ်လ နေခဲ့ရလဲ။ ပြီးတော့ ဘယ်လိုမျိုးပြန်လွတ်လာခဲ့တာလဲ။

​ဖြေ – ကျနော်ကတော့ တစ်လတိတိနေခဲ့ရတယ်။ ၃လပိုင်း ၁၆ရက်နေ့ ညနေပိုင်းလောက်မှာ ကျနော်တို့ကို နာမည်စာရင်းကောက်တယ်။ အရင်ကျဖူးတဲ့သူတွေ ပြောတာကတော့ ပြန်လွတ်ခါနီးရင် အဲ့လိုစာရင်းကောက်တယ်ပြောတယ်။ သူတို့ဖမ်းမိတုန်းကကြတော့ စာရင်းကောက်ပြီးမှ မိတာဆိုတော့ အရင်တစ်ခါလွတ်တုန်းက သူတို့မပါလိုက်ဘူးပေါ့။ အဲ့တာနဲ့ ၁၇ရက်နေ့ရောက်တော့ ကျနော်တို့ကိုအချုပ်ခန်းထဲကခေါ်ထုတ်လာတယ်။ ဖမ်းတုန်းကသိမ်းထားတဲ့ ဖုန်းတွေ၊ ဘာတွေတော့ ပြန်ပေးသေးတယ်။ နာမည်စာရင်းနဲ့တိုက်ပြီးတော့ပေါ့။ အဲ့ဒီတော့မှလွတ်တယ်သိတာ။ လှေပေါ်တက်ရတော့မှ ကော့သောင်းကိုပြန်ရတော့မယ်ဆိုတာ သိတယ်၊၊

မေး – အခုက ထိုင်းဘက်ပြန်ရောက်နေတယ်ဆိုတော့ ထပ်အဖမ်းခံရမှာမျိုးကို စိတ်မပူဘူးလား။ ဘာကြောင့် အခုလိုထပ်သွားဖြစ်တာလဲ။

ဖြေ – ထပ်သွားဖြစ်တာကတော့ ဒီမှာ(မြန်မာနိုင်ငံ)ကအလုပ်က အမြဲတမ်းမရှိဘူးလေ။ နိုင်ငံရေးကလည်း မကောင်းတော့ ပြန်သွားဖို့စဥ်းစားမိတယ်။ အဲ့ဒါနဲ့ ပြန်ဝင်လာတာ။ အဖမ်းခံရမှာတော့သိပ်မပူဘူး။ လာမဲ့၅လပိုင်းကျ ပန်းရောင်ကတ်လုပ်ပေးမယ်ပြောတယ်။ အဲ့ဒီကြ လုပ်မယ်လို့တော့ စဥ်းစားထားတယ်၊၊

မေး – ထိုင်းကို ရောက်နေတဲ့ မြန်မာတွေ၊ လာဖို့ကြိုးစားနေတဲ့မြန်မာတွေကို ဘယ်လိုအကြံပေးချင်တာရှိလဲ။

ဖြေ – လာမဲ့သူတွေကိုတော့ ခိုးလမ်းနဲ့မလာစေချင်ဘူး။ မြန်မာနိုင်ငံသားမှတ်ပုံတင်လည်း ရှိတယ်ဆို ကော့သောင်းစာအုပ်လုပ်ပြီး တရားဝင်လမ်းကြောင်းနဲ့ လာရင်လည်း ရနေပြီ။ တရားဝင်နည်းနဲ့ပဲ လာကြဖို့ ပြောချင်ပါတယ်၊၊

The Tanintharyi Times

• အင်တာဗျူး
• အမြင်