လောင်းလုံးမြို့နယ်မှာ စစ်ကြောင်းထိုးချိန် အဖမ်းခံရပြီး ပြန်လွတ်လာသူတစ်ဦးနဲ့ အင်တာဗျူး

လောင်းလုံးမြို့နယ်အတွင်းက ကမ်းခြေရွာအချို့ကို စစ်ကောင်စီတပ်က အခုလအတွင်းမှာ စစ်ကြောင်းထိုး ဝင်ရောက်ခဲ့ပါတယ်။ တောလမ်းအတိုင်း မနက်စောစော ဝင်ရောက်လာတဲ့ စစ်ကြောင်းက သဘော့ဆိပ်ရွာထဲက ရွာသားအများအပြားကို ဖမ်းဆီးခဲ့တယ်။ အဲဒီနေ့က ဖမ်းဆီးခံရပြီး ပြန်လည်လွတ်မြောက်လာခဲ့တဲ့ အသက်လတ်ပိုင်းအရွယ် ကိုစိုးကို မေးမြန်းပြီးတနင်္သာရီတိုင်းမ်ရဲ့ “တောင်ပိုင်းသားတို့အသံ” ကဏ္ဍကနေ ဖော်ပြလိုက်ပါတယ်။

(တောင်ပိုင်းသားတို့ အသံ)

မေး – ဘယ်လို အဖမ်းခံခဲ့ရတာလဲ။

ဖြေ – ကျနော်ကလမ်းပေါ်မှာအဖမ်းခံရတာ။ ဆိုင်ကယ်ကိုတားပြီး ဖမ်းလိုက်တာ။ ပြီးတော့ ကျနော့်ကို ခြေလျင်ခေါ်သွားတာ။

မေး – သူတို့ရွာထဲဝင်လာနေတယ်ဆိုတာကို သတင်းကြို မကြားရဘူးလား။

ဖြေ – ဘာသတင်းမှမကြားဘဲ ရုတ်တရက်ရောက်လာကြတာ။ တောလမ်းအတိုင်းဆိုတော့ ကျနော်တို့ဘာမှမသိဘူး။ သူတို့မလာခင် ညနေပိုင်းကတော့ သဘော့ဆိပ်ရွာကမ်းနားမှာ စစ်သင်္ဘာတစ်စီး ကျောက်ချပြီး လာရပ်ထားတယ်။ ဒီလောက်ပဲရှိတာ။ ကျန်တာဘာမှမသိဘူး။

မေး – ဖမ်းပြီးတော့ဘယ်ကိုခေါ်သွားတာလဲ။

ဖြေ – ဖမ်းပြီးတော့ အကုန်ခေါင်းငုံ့ခိုင်းပြီး ပြင်ကြီးဘုန်းကြီးကျောင်းကို ခေါ်သွားတယ်။ ကျနော်နဲ့အတူတူဆိုရင် အမျိုးသားချည်းပဲ ၂၀ လောက်ရှိမယ်။ အမျိုးသမီးတော့ မပါဘူး။ အဖမ်းခံရသူတွေကတော့ လမ်းမှာတားပြီးဖမ်းသွားသူတွေ၊ အိမ်မှာနေနေတာကို ခေါ်လာတဲ့သူတွေအစုံပဲ။

မေး – ဘာတွေစစ်ဆေးလဲ၊ ရိုက်နှက်တာတွေရောရှိလား။

ဖြေ – ကျနော်တို့ကိုတော့ ဘာမှမမေးဘူး။ ဘယ်ရွာကလဲ၊ ဘယ်သူလဲဆိုတာ လောက်ပဲ။ ပြီးတော့ အားလုံးကို ကျောင်းရှေ့မှာ ခေါင်းငုံ့ပြီး ဒူးထောက်ခိုင်းထားတယ်။ မိနစ် ၂၀ ဝန်းကျင်လောက်ရှိမယ်။ အဲဒီမှာ ခေါင်းမငုံ့လို့ဆိုပြီးတော့ အသက်ကြီးပိုင်း လူကြီးနှစ်ယောက်သုံးယောက်ကိုတော့ ဝိုင်းကန်ကျောက်ကြတာရှိတယ်။

မေး – ဖမ်းဆီးထားချိန် သူတို့ဘယ်လိုတွေပြောတာမျိုးကြားရလဲ။

ဖြေ – သူပုန်ရွာကို သူပုန်ရွာလိုပဲဆက်ဆံမယ်လို့ပြောတယ်။ ကျန်တာတော့ ကျနော်တို့ရှေ့မှာ ဘာမှအများကြီးမပြောကြဘူး။ ဘယ်သွားမယ်၊ ဘာလာလုပ်တယ်ဆိုတာတွေ ဘာမှမပြောဘူး။

မေး – သူတို့ရဲ့ပုံစံက ဘယ်လိုမျိုးရှိလဲ။ အင်အားကရော ဘယ်လောက်ရှိလဲ။

ဖြေ – သူတို့ထဲကအရာရှိလို့ထင်ရသူကတော့ ယူနီဖောင်းဝတ်ထားတယ်။ ကျန်တာတွေက အကုန်အရပ်ဝတ်တွေ၊ ဘောင်းဘီတိုတွေနဲ့။ ကျည်ကာနဲ့ သေနတ်တွေတွေတော့ အကုန်လုံးမှာရှိတယ်။ ကျနော်တို့ သေချာတော့ ကြည့်လို့မရဘူး။ ခေါင်းငုံ့ခိုင်းထားတော့လေ။ အင်အားကတော့ ၃၀ ကျော်လောက်ရှိမယ်ထင်တယ်။

မေး – ဘယ်အချိန်မှာပြန်လွတ်လာတာလဲ။

ဖြေ – ကျနော်တို့ကိုကြတော့ နာရီဝက်လောက်အကြာမှာပဲ ပြန်ခိုင်းလိုက်တယ်။ သဘော့ဆိပ်ရွာ ကမ်းခြေလမ်းကလူတွေကတော့ တရက်လုံးအဖမ်းခံရတယ်။ အိမ်တွေလည်းအမွှေခံရတယ်။ တော်တော်သောင်းကြမ်းသွားတယ်။

မေး – ကမ်းခြေလမ်းမှာ ဘာတွေလုပ်သွားတာလဲ။

ဖြေ – ကမ်းခြေဘက်ကအိမ်တွေကို ဘုန်းကြီးကျောင်းကို အရင်သွားနေခိုင်းတာရှိတယ်။ လူဘယ်လောက်လဲဆိုတာတော့ မသိပေမဲ့ တော်တော်များတယ်။ အဲဒီမှာတော့ တော်တော်မွှေသွားတယ်။ ပိုက်ဆံတွေ၊ ရွှေတွေအကုန်ယူတယ်။ ကုန်စုံဆိုင်တွေမှာလည်း အကုန်ယူတယ်။ ဖုန်းဆိုင်တွေမှာပါ ဖုန်းတွေယူသွားတယ်။ ပြီးတော့ ရိုက်ဖျက်သွားတာတွေဖျက်ဆီးသွားတယ်။ တရွာလုံးမှာတော့ အဲဒီလမ်းအဓိက အထိနာတယ်။

မေး – လက်ရှိရွာရဲ့အခြေအနေဘယ်လိုရှိလဲ။

ဖြေ – လက်ရှိကတော့ သတင်းတွေအမျိုးမျိုးကြားနေရတာပဲ။ ပြန်ဝင်မယ် လိုလိုလည်းကြားရတယ်။

The Tanintharyi Times

• အင်တာဗျူး
• အမြင်