စစ်ကောင်စီဆေးတပ်က တပ်ကြပ်ကြီးစာရေးတစ်ဦးကို ပုလောက PDF တွေဖမ်းဆီး
စစ်ကောင်စီဆေးတပ်က တပ်ကြပ်ကြီးစာရေးတစ်ဦးကို ပုလောက PDF တွေဖမ်းဆီး
ဘုတ်ပြင်းမြို့ဆေးတပ်က စစ်ကောင်စီ တပ်ကြပ်ကြီးစာရေးတစ်ဦးကို ပြည်ထောင်စုလမ်းမကြီးပေါ်မှာ ဖမ်းဆီးခဲ့တယ်လို့ပုလောဒေသကာကွယ်ရေးတပ်ဖွဲ့ PRDF သတင်းထုတ်ပြန်ပါတယ်။
အခုလ ၂၁ရက်နေ့ ညနေပိုင်းက ကဒဲကျေးရွာနဲ့ သင်္ကန်းတောကျေးရွာအနီးက လမ်းမကြီးပေါ်မှာ ပြည်သူ့ကာကွယ်ရေးတပ်က စစ်ဆေးမှုတွေပြုလုပ်နေချိန် ခရီးသည်ကားနဲ့လိုက်ပါလာတဲ့သူ့ကိုဖမ်းဆီးရမိခဲ့တာပါ။
ဖမ်းဆီးရမိသူကတော့ ဘုတ်ပြင်းမြို့ (တဆရ ဆေးရုံ ၁၈/၁၀၀)က တပ်ကြပ်ကြီးစာရေး သန်းဇော်ဦးဖြစ်ပြီး လက်ရှိမှာတော့သူ့ကို PRDF အဖွဲ့က ဖမ်းဆီးထိန်းသိမ်းထားတယ်လို့သိရပါတယ်။
“ဆွေးနွေးတိုင်ပင်ပြီးမှ သူ့ကို ဘယ်လိုအရေးယူမလဲဆိုတာ ဆုံးဖြတ်သွားပါ့မယ်” လို့ ပုလောဒေသကာကွယ်ရေးတပ်ဖွဲ့ PRDF ရဲ့တာဝန်ရှိသူကပြောပါတယ်။
သူဟာ စစ်သံရုံးဝင်ခွင့်ဖြေရာကပြန်လာသူဖြစ်ပြီး တာဝန်ထမ်းဆောင်ချိန် ၁၆ နှစ်ကျော်ရှိပြီဖြစ်တယ်လို့သိရပါတယ်။
ဖမ်းဆီးချိန် သူဆီကနေ ဖုန်းတစ်လုံးနဲ့ ငွေနှစ်သောင်းကျော်သိမ်းဆည်းရမိခဲ့တယ်လို့ ထုတ်ပြန်ချက်မှာဖော်ပြထားပါတယ်။
အခုလ ၂ ရက်နေ့ကလည်း တနင်္သာရီမြို့နယ်၊ ဇဝဲအခြေစိုက် ခမရ (၅၅၆)တပ်ရင်းက စစ်ကောင်စီ တပ်သားတစ်ဦးကို PRDFကစစ်ဆေး ဖမ်းဆီးခဲ့ပါတယ်။
အလားတူ ပြီးခဲ့တဲ့နှစ် ဒီဇင်ဘာ ၂၄ ရက်နေ့ကလည်း ကော့သောင်းအကျဥ်းထောင်က ဦးစီးမှုးတစ်ဦးကို ကပုလောမြို့နယ်လမ်းပေါ်မှာ PRDFက ဖမ်းဆီးခဲ့ပါသေးတယ်။
The Tanintharyi Times