ရေဖြူအခြေစိုက် ပြည်သူ့ကာကွယ်ရေးဆေးတပ်ဖွဲ့ တာဝန်ခံနဲ့ အင်တာဗျူး”
ရေဖြူအခြေစိုက် ပြည်သူ့ကာကွယ်ရေးဆေးတပ်ဖွဲ့ တာဝန်ခံနဲ့ အင်တာဗျူး”
ထားဝယ်ခရိုင်အတွင်းက ရေဖြူမြို့နယ်မှာ ပြည်သူ့ကာကွယ်ရေးဆေးတပ်ရဲ့ ဆေးတပ်ဖွဲ့တစ်ခုကို ပြီးခဲ့တဲ့လအတွင်းက ဖွဲ့စည်းခဲ့ပါတယ်။ အဲဒီဆေးတပ်ဖွဲ့ဟာ ဒဏ်ရာရရဲဘော်တွေအပြင် ကျေးရွာတွေအတွင်းက ဒေသခံတွေကိုလည်း ကုသမှုတွေ လုပ်ဆောင်ပေးနေတယ်လို့ သိရပါတယ်။ သူတို့အဖွဲ့ ဘယ်လိုတွေ ကုသမှု ပေးနေလဲ၊ ဘာတွေလိုအပ်နေလဲဆိုတာတွေကို အဖွဲ့တာဝန်ခံကို မေးမြန်းပြီး ဒီတစ်ပတ် တနင်္သာရီတိုင်းမ်ရဲ့”တောင်ပိုင်းသားတို့အသံ” ကဏ္ဍကနေ တင်ဆက်ပေးလိုက်ပါတယ်။
“တောင်ပိုင်းသားတို့အသံ”
မေး - ဆေးတပ်ဖွဲ့ကို ဖွဲ့စည်းဖြစ်ခဲ့ပုံကိုလည်း ပြောပြပေးပါ။
ဖြေ - စဖွဲ့စည်းဖြစ်ပုံကတော့ ပြည်သူတွေရော၊ ကျနော်တို့ဝေဟင်အဖွဲ့ရော၊ မဟာမိတ် အဖွဲ့တွေရောအတွက် အဆင်ပြေစေဖို့ ဖွဲ့စည်းဖြစ်ခဲ့တာပါ။
မေး - ဘယ်အချိန်မှာ စဖွဲ့စည်းခဲ့တာပါလဲ။
ဖြေ - ဝေဟင်ဆေးတပ်ဖွဲ့က အရင်ကတည်းကရှိပေမဲ့ ကျနော်တို့က ဝေဟင်ဆေးတပ်ဖွဲ့ Page ထောင်တဲ့နေ့ ပြီးခဲ့ဇွန်လ ၈ ရက်နေ့ကို စဖွဲ့စည်းတဲ့နေ့အဖြစ် သတ်မှတ်ထားပါတယ်။
မေး - ဖွဲ့စည်းတဲ့အချိန်ကစပြီး လက်ရှိအချိန်ထိ လူနာဘယ်နှယောက်လောက်အထိ ကုသပေးခဲ့ပြီးပြီလဲ။
ဖြေ - ဖွဲ့စည်းတဲ့အချိန်က ဆိုတာထက် ကျနော်တို့စပြီး မှတ်တမ်းလုပ်တဲ့ အချိန်ကို ပြောရမှာပေါ့နော်။ လက်ရှိအချိန်ထိဆိုရင် ဆေးရုံတက်လူနာ၊ ပြင်ပလူနာ၊ တပ်တွင်းရဲဘော်တွေနဲ့ မဟာမိတ်တွေရော စုစုပေါင်း ၂၀၀ ကျော်ကို ကုသပေးနိုင်ခဲ့ပါတယ်ဗျ။
မေး - ပြင်ပလူနာတွေကို ဘယ်လိုပုံစံမျိုးနဲ့ကုသပေးနေတာလဲ။
ဖြေ - လက်ရှိမှာ ပြင်ပလူနာတွေကိုတော့ ရွေ့လျားဆေးခန်း(Mobile Clinic) နဲ့ အထိုင်ဆေးခန်း(Fixed Clinc) ပုံစံ နှစ်မျိုးစလုံးနဲ့ ကုသပေးပါတယ်ဗျ။
မေး - ဘယ်လိုလူနာတွေက အဓိကလာရောက်ကုသကြတာလဲ။ ဘယ်အနေထားအထိကုသပေးနိုင်နေပြီလဲ။
ဖြေ - အဓိက ကတော့ ကျနော်တို့ လက်လှမ်းမှီသလောက် ကျေးရွာတွေက ပြည်သူတွေနဲ့ ကျေးရွာတွေက ဆေးရုံတက်ဖို့ အခက်ခဲရှိတဲ့လူနာတွေကိုအဓိက ကုသပေးပါတယ်။ ရှေ့တန်း စစ်မြေပြင်မှာ ဒဏ်ရာရတဲ့လူနာတွေ တပ်တွင်းရဲဘော်တွေကိုလည်း ကုသပေးနိုင်နေပြီဖြစ်ပါတယ်။
မေး - လက်ရှိဆေးတပ်ဖွဲ့မှာ ဘယ်လိုအခက်အခဲတွေရှိလဲ။
ဖြေ - အခက်အခဲကတော့ အများကြီးပါပဲဗျ။ အဓိက ကတော့ ဆေးဝါးဝယ်ယူဖို့ ငွေကြေးမလုံလောက်တဲ့ပြဿနာပါ။ ဘတ်ဂျက်ပြဿနာပေါ့ခင်ဗျ။ ပြီးတော့ဆေးဝါးသယ်ယူရတဲ့ အခက်အခဲတွေပါ။
မေး - ဆေးဝါးပြတ်တောက်တာမျိုးရော ကြုံရဖူးလား။
ဖြေ - ဆေးဝါးကတော့ ပြတ်တောက်တယ်ဗျ။ တစ်ခါတလေ အရေးပေါ်လူနာပေါ်လာမှ ဆေးဝါးအဆင်သင့်မရှိလို့ ဝယ်ရတဲ့အခြေအနေတွေအထိရှိပါတယ်။ ဆေးဝါး သယ်ယူဖိူ့အတွက်ကလည်း အခက်အခဲအများကြီးရှိတာကြောင့်ပါ။
မေး - ဝေဟင်ဆေးတပ်ဖွဲ့ကို ဘယ်လိုအနေအထားအထိဖြစ်လာဖို့ ရည်ရွယ်ထားလဲ။
ဖြေ - ဝေဟင်ဆေးတပ်ဖွဲ့ကို ဆေးရုံ၊ ဆေးခန်းသွားဖို့ ခက်ခဲတဲ့ပြည်သူတွေနဲ့ ကျနော်တို့ ရဲဘော်တွေ၊ မဟာမိတ်တွေရောအတွက်ပါ အားထားရတဲ့ ဆေးတပ်ဖွဲ့ တစ်ဖွဲ့ ဖြစ်လာဖို့အထိရည်ရွယ်ထားပါတယ်ဗျ။
မေး - နောက်ထပ် ဖြည့်စွက်ပြောကြားချင်တာရှိရင်လည်း ပြောပြပေးပါ။
ဖြေ - ဖြည့်စွက်ပြောချင်တာကတော့ ကျနော်တို့အဖွဲ့က အခုမှ စပြီးလည်ပတ်ရတာဆိုတော့ ငွေကြေးမရှိပါဘူး။ ဘတ်ဂျက်နည်းပါတယ်။ ဒါကြောင့် ပြည်သူတွေအနေနဲ့ တတ်စွမ်းနိုင်သလောက် ပါဝင်ကူညီဖိုတောင်းဆိုချင်ပါတယ်။ ကျနော်တို့ ကလည်း ပြည်သူတွေရော၊ တော်လှန်ရေး ရဲဘော်တွေအတွက်ရော အသင့်ရှိနေမယ်လို့ ပြောချင်ပါတယ်။
The Tanintharyi Times
