လောင်းလုံးက နေအိမ် ၅ ဆောင်ကို စစ်ကောင်စီတပ်နဲ့ပျူစောထီးတွေ မီးရှို့ဖျက်ဆီးသွား
လောင်းလုံးက နေအိမ် ၅ ဆောင်ကို စစ်ကောင်စီတပ်နဲ့ပျူစောထီးတွေ မီးရှို့ဖျက်ဆီးသွား
ထားဝယ်ခရိုင်၊ လောင်းလုံးမြို့နယ် ဟင်းချိုတောကျေးရွာက နေအိမ် ၅ ဆောင်ကို စစ်ကောင်စီတပ်သားနဲ့ပျူစောထီးတွေ ဒီကနေ့ မနက် အာရုံဦးအချိန်မှာ မီးရှိူ့ဖျက်ဆီးခဲ့တယ်လို့ ဒေသခံတွေဆီကသိရပါတယ်။
မနက် ၄ နာရီခွဲဝန်းကျင်လောက်မှာ စစ်ကောင်စီတပ်သားနဲ့ပျူစောထီးတွေ ရောက်လာပြီး ပျူစောထီးလက်ညှိုးထိုးတဲ့ နေအိမ်တွေကို မီးရှို့သွားတာလို့ ဒေသခံက ဆိုပါတယ်။
“အရင်ဆုံးအဲဒီတဝိုက်အိမ်တွေက ဖုန်းတွေကိုသိမ်းတယ် ပြီးတာနဲ့ မီးရှို့တာပဲ။ သေနတ်တွေလည်း ရမ်းသမ်းပစ်ကြတယ်” လို့ ဒေသခံက ပြောပါတယ်။
စစ်ကောင်စီတပ်သား အင်အား ၂၀ လောက်ဟာ ကျောက်နီမော်ကျေးရွာကို လှေနဲ့ဆင်းလာပြီးနောက် ပျူစောထီးအဖွဲ့ဝင်တွေကို ခေါ်ယူကာ အခုလိုမီးရှို့သွားတာလို့ ဒေသခံကရှင်းပြပါတယ်။
“ရေလမ်းကနေလာတာပါ။ လာတဲ့အချိန်က မှောင်သေးတော့ ရဘဲကမ်းကလား၊ သကျက်တောဘက်ကဝင်တာလားမသိဘူး။ မီးရှိူ့ပစ်ခတ်ပြီးတာနဲ့ သိပ်မကြာဘူး ပြန်သွားတယ်” လို့ ဒေသခံက ဆက်ပြောပါတယ်။
မီးရှို့ခံရတဲ့ နေအိမ် ၅ ဆောင်မှာ ၃ ဆောင်ပြာကျပျက်စီးခဲ့ပြီး ၂ ဆောင်ကတော့ မီးငြိမ်းသတ်နိုင်လို့ တချိူ့တဝက်ပျက်စီးခဲ့တယ်လို့သိရပါတယ်။ အဲဒီနေအိမ်တွေက ဆိုင်ကယ် ၂ စီးလည်းမီးလောင် ပျက်ဆီးခဲ့တယ်လို့ သိရပါတယ်။
မီးရှို့ခံရတဲ့နေအိမ်တွေဟာ သာမာန်ပြည်သူနေအိမ်တွေသာဖြစ်ပြီး ဒေသခံတွေကို ဖမ်းဆီးခေါ်ဆောင်သွားတာမျိုးတော့ မရှိဘူးလို့ သိရပါတယ်။
မီးရှို့သွားတဲ့ စစ်ကောင်စီတပ်သားတွေဟာ ကျောက်နီမော်ရွာကနေ အခုအခါပြန်သွားကြပြီး ၁၁ နာရီလောက်မှာ ညင်းမော်မြစ်ကမ်းကို ကျော်လွန်ဆန်တက်သွားတယ်လို့ သိရပါတယ်။
The Tanintharyi Times