ဝက်သားကင်ကျေးရွာမှာ စစ်ကောင်စီသတင်းပေးဆိုသူတစ်ဦး ပစ်သတ်ခံရ
ဝက်သားကင်ကျေးရွာမှာ စစ်ကောင်စီသတင်းပေးဆိုသူတစ်ဦး ပစ်သတ်ခံရ
လောင်းလုံးမြို့နယ်မှာရှိတဲ့ ကဒက်ကြီးကျေးရွာအုပ်စုထဲက ဝက်သားကင်ကျေးရွာလမ်းပေါ်မှာ အသက် ၃၀ အရွယ် အမျိုးသားတစ်ဦး ပစ်သတ်ခံလိုက်ရတယ်လို့ဒေသခံတွေထံကသိရပါတယ်။
ပစ်သတ်ခံရသူဟာ အသက် ၃၀ ခန့်အရွယ် ကိုမျိုးဆိုသူဖြစ်ပြီး ရွာလမ်းပေါ်မှာပဲ မနေ့က ညနေ ၄နာရီလောက်အချိန်မှာ ပစ်သတ်ခံလိုက်ရတာပါ။
ကိုမျိုးဟာ အောက်ရေဖြူကျေးရွာအုပ်စု၊ ကဒက်ငယ်ထိန်ရွာသားဖြစ်ပြီး ပန်းရံလုပ်ငန်းလုပ်ကိုင်သူတစ်ဦးဖြစ်တယ်လို့လည်းသိရပါတယ်။
“သူကပျူစောထီးလုပ်ချင်သူတွေကိုစာရင်းတောင်းတုန်းကစာရင်းပေးထားတယ်။ လက်နက်ကိုင်ပြီးနေတာမျိုးတော့မရှိဘူးပေါ့။ ကဒက်ငယ်ရွာကို စစ်ကောင်စီတပ်သားတွေတောနင်းချိန်က လိုက်ပါလမ်းညွှန်တာတွေလုပ်တယ်။ တစ်ရွာလုံးကတော့ ဒလန်လို့သတ်မှတ်ထားသူပေါ့” လို့ဒေသခံတစ်ဦးကပြောပါတယ်။
အဲဒီပြောဆိုချက်အပေါ်သီးခြားအတည်ပြုနိုင်တာမျိုးတော့မရှိသေးပါဘူး။
ပစ်သတ်ခံရသူကိုမျိုးကတော့ နေရာမှာပဲသေဆုံးသွားပြီး အလောင်းကိုတော့ နောက်တစ်နာရီလောက်အကြာမှာ အရေးပေါ်ကားနဲ့တင်ဆောင်သွားတယ်လို့သိရပါတယ်။
သူ့ကိုဘယ်အဖွဲ့ကပစ်သတ်ခဲ့တယ်ဆိုတာကိုတော့မသိရသေးပါဘူး။
The Tanintharyi Times