မလေးရှားသွားမယ့် မြန်မာ ၂၁ ဦး ထိုင်းတောင်ပိုင်းမှာ အဖမ်းခံရ
မလေးရှားသွားမယ့် မြန်မာ ၂၁ ဦး ထိုင်းတောင်ပိုင်းမှာ အဖမ်းခံရ
မလေးရှားကိုသွားမယ့် မြန်မာ ၂၁ ဦးကို မူးယစ်ဆေးတွေနဲ့အတူ ထိုင်းနိုင်ငံ၊ ပါကျွတ်ခိရိယမ်ခရိုင်မှာ ဖမ်းမိခဲ့တယ်လို့ ထိုင်းသတင်းတွေမှာ ဖော်ပြထားပါတယ်။
၎င်းတို့ကို အခုလ ၁၀ ရက်နေ့က ဖမ်းဆီးခဲ့တာဖြစ်ပြီး ဖမ်းမိသူတွေထဲမှာ အမျိုးသား ၁၄ ဦးနဲ့အမျိုးသမီး ၇ ဦး ပါဝင်ပါတယ်။ သူတို့နဲ့အတူ ခေါ်လာတဲ့ အလုပ်သမားပွဲစား ၃ ဦးတို့ကို ပါကျွတ်ခီရိယမ် ရဲစခန်းမှာ ထိန်းသိမ်းထားတယ်လို့ သိရပါတယ်။
နယ်စပ်ကနေ ဖြတ်ကျော်ဝင်ရောက်ဖို့အတွက် ပွဲစားတွေကို ပို့ဆောင်ခအဖြစ် တစ်ဦးကို ဘတ်လေးသောင်းပေးရတယ်လို့လည်း သိရပါတယ်။
ဖမ်းဆီးခံရသူတွေထဲက တစ်ဦးရဲ့အဝတ်အစားထည့်ကျောပိုးအိတ်ထဲမှာ ယာဘစိတ်ကြွဆေးနဲ့ အိုက်စ်လို့အမည်ရှိတဲ့ မူးယစ်ဆေးဝါးကို စစ်ဆေးတွေ့ရှိခဲ့ပါတယ်။
ဖမ်းဆီးခံရသူတွေဟာ မွန်ပြည်နယ်၊ မုဒုံမြို့ကနေလာကြတာဖြစ်ပြီး ထိုင်းနိုင်ငံကတစ်ဆင့် မလေးရှားနိုင်ငံမှာ အလုပ်သွားလုပ်ကြမှာပါ။
ပြီးခဲ့တဲ့ ၇ ရက်နေ့ကလည်း ထိုင်းကနေ မလေးကို တရားမဝင်ရွှေ့ပြောင်းလုပ်သားတွေပို့ဆောင်နေတဲ့ ထိုင်းအမျိုးသမီးတစ်ဦးကို ထိုင်းဘက်က ဖမ်းဆီးခဲ့ပါတယ်။
The Tanintharyi Times