ရှင်းရှင်းပြောရရင် စစ်တပ်အာဏာရှင်တွေ အကုန်အမြစ်ပြတ်သွား စေချင်တယ်။ အဲဒါဆို ပြီးသွားပြီဗျ။

ဒီတစ်ပတ် “တောင်ပိုင်းသားတို့အသံ” ကဏ္ဍအတွက် ထားဝယ်က လူငယ်တစ်ယောက်ရဲ့အသံကို ဖော်ပြဖို့ ရွေးချယ်ထားပါတယ်။
သူ့နာမည်က “ကိုစိုး”။ အသက် ၂၀ ကျော်အရွယ်။ ကား၊ ဆိုင်ကယ်တွေ ပြုပြင်တဲ့အလုပ်နဲ့ အသက်မွေးဝမ်းကျောင်းတဲ့သူ။ ဒီနှစ်သင်္ကြန်အပေါ် လူငယ်တစ်ယောက်ရဲ့အမြင်နဲ့ သူဘယ်လိုဖြတ်ကျော်ခဲ့လဲ၊ သူ့စိတ်ထဲဘယ်လိုရှိနေလဲ ဆိုတာကို The Tanintharyi Times က မေးမြန်းထားပါတယ်။

မေး – သင်္ကြန်ပွဲတော်အပေါ် ခံစားချက် ဘယ်လိုရှိလဲ။
ဖြေ – သင်္ကြန်ဆိုတာ ကျနော်တို့နိုင်ငံက ပွဲတော်တွေထဲမှာ ကျနော်အပျော်ဆုံးပွဲပဲ။ တော်တော်များများလည်း အဲလိုပဲလို့ထင်တယ်။ သင်္ကြန်ရောက်တော့မယ်ဆိုတာနဲ့ စိတ်က အလိုလိုပျော်နေတာလေ။ သင်္ကြန်သီချင်းသံလေးတွေကြားရင် သင်္ကြန်ပိုးဆိုတာက ထိန်းမရဘူး။ လူငယ်တွေဆိုပိုဆိုးတာပေါ့ အပြိုင်အဆိုင်အစီစဥ်တွေဆွဲထားကြတာ။

မေး – ဟိုးအရင်နှစ်တွေမှာသင်္ကြန် ပွဲတော်ကို ဘယ်လိုဆင်နွှဲဖြစ်လဲ။
ဖြေ – အရင် ၃နှစ်လောက်က နောက်ဆုံးပျော်ခဲ့ကြတာပေါ့။ လူငယ်ဆိုတော့အပျော်မက်တယ်။ တနှစ်လုံး အလုပ်တွေကြိုးစားပြီး လုပ်ကြပြီးရင် ဒီအချိန်ကအနားယူမယ့် အချိန်ပဲလေ။ နေရာအစုံကသူငယ်ချင်းတွေလည်း ပြန်ဆုံကြတယ်။ လူငယ်သဘာဝ သောက်ကြမယ်၊ စားကြမယ်။ ရေပက်ခံထွက်တာ၊ အုန်းလက်မဏ္ဍပ်တွေထိုးတာ၊ အစုံပါပဲ။ သင်္ကြန် ၄ရက်စလုံးက တနေ့တမျိုး အစီအစဉ်တွေချပြီး ကဲတာလေ။

မေး – ဒီနှစ်သင်္ကြန်ရော ဘာတွေလုပ်ဖြစ်လဲ။
ဖြေ – ဒီနှစ်ကတော့ အရင်က အခြေအနေတွေတစ်ခုမှ မရှိတော့ပါဘူး။ မနှစ်ကသင်္ကြန်ရော၊ ဒီနှစ်သင်္ကြန်ရောက အရင်လိုပျော်မြူးနေရမယ့် အခြေအနေလည်း မဟုတ်ဘူးလေ။ ဒါကြောင့် သင်္ကြန်တွင်း တစ်ခုလုံး အိမ်မှာပဲ။ အပြင်လည်းမထွက်ဘူး၊ ဘာအစီစဉ်မှလည်း မရှိဘူး။ သူငယ်ချင်းတွေလည်း ကျနော့်လိုချည်းပါပဲ။ ဟာတာတာကြီးတော့ ဖြစ်တာပေါ့။ တသက်လုံးပျော်လာတဲ့သင်္ကြန် မရှိတော့တာကို။

မေး – ဘာကြောင့် ဒီနှစ်သင်္ကြန်ကိုအခုလိုဖြတ်သန်းဖြစ်တာလဲ။
ဖြေ – ကျနော်ကတော့ ကိုယ့်အသိစိတ်နဲ့ကိုယ် အခုလိုပဲနေမယ်လို့ ဆုံးဖြတ်လိုက်တာပါပဲ။ ကျနော်တို့က နိုင်ငံရေးအများကြီးမသိပါဘူး။ သာမာန် လက်လုပ်လက်စားဘဝသမားတွေပါပဲ။ ဒါပေမယ့် ဘာကိုလုပ်သင့်တယ်၊ ဘာကိုတော့မလုပ်သင့်ဘူးဆိုတာကိုတော့ သိပါတယ်။ ကျနော်တို့အခုလိုလေးနေပေးလိုက်တာက ကျနော်တို့တက်နိုင်တဲ့ဘက်က ကူညီတာပဲလေ။ ကျနော့်သူငယ်ချင်းတချို့လည်း တောထဲရောက်ပြီး ဒုက္ခဆင်းရဲခံနေရတယ်။ အရင်လိုလူစုံမှပဲ သင်္ကြန်ပွဲတော်ကို ပျော်ပျော်ကြီးဆင်နွဲတော့မယ်ဗျာ။

မေး – စစ်ကောင်စီကကျင်းပပေးတဲ့သင်္ကြန်အပေါ် ဘယ်လိုမြင်လဲ။
ဖြေ – သူတိုကတော့ ကမ္ဘာကို သူတို့ကောင်းကောင်းအုပ်ချုပ်နေကြောင်း ပြချင်တာပေါ့။ဒါကြောင့် မဖြစ်ဖြစ်တဲ့နည်းနဲ့ မဏ္ဍပ်တွေဆောက်ပြီး လုပ်ပြတာပေါ့။ လူတွေကိုစေတနာပါလို့ မဟုတ်ဘူးဆိုတာ အားလုံးသိတာပဲလေ။ စိတ်တွေကလည်းလူစိတ်တွေ မဟုတ်ဘူး။ ဘယ်အချိန်ပြည်သူကိုထပစ်သတ်မလဲဆိုတာ ဘယ်သူမှမပြောနိုင်ဘူးဗျ။ ကျနော်ကတော့ ကြောက်လွန်းလို့ အနားတောင် မကပ်ဘူး။

မေး – တချို့လူတွေ စစ်ကောင်စီမဏ္ဍပ်တွေကိုသွားပြီး ကခုန်နေတဲ့အပေါ် ဘာပြောချင်လဲ။
ဖြေ – ကျနော်တို့မြို့မှာတော့ မြို့ခံလူတွေလုံးဝမရှိသလောက်ပဲဗျ။ အိမ်ရှေ့တောင် တအိမ်မှ ရေမပက်ကြဘူး။ အခု ထားဝယ်က မဏ္ဍပ်တချို့မှာ ရှိနေတဲ့သူတွေကလည်း စစ်တပ်မိသားစုတွေ၊ ကြံ့ဖွတ်တွေ နဲ့ အရပ်ဝတ်စစ်သားတွေချည်းပဲ ဆိုတာသိသာတယ်။
ဒီကောင်တွေကတော့ လူလို့သတ်မှတ်လို့မှမရတော့ပဲ။

မေး – အခုလက်ရှိနိုင်ငံရေးအခြေအနေက လက်လုပ်လက်စားတယောက်အတွက်ဘယ်လို အကျိုးသက်ရောက်မှုတွေရှိလဲ။
ဖြေ – အကျိုးသက်ရောက်မှုကတော့ အများကြီးပါပဲဗျာ။ အာဏာသိမ်းပြီးနောက်ပိုင်းကတည်းက တနိုင်ငံလုံးမှာ သူတို့နဲ့ပေါင်းစားတဲ့ သူတွေကလွှဲပြီး ဘယ်သူမှအဆင်ပြေမယ်လို့မထင်ဘူး။ ကျနော်တို့လို့ အောက်ခြေလူတန်းစားတွေက အဓိကခံရတာပေါ့။ ကုန်စျေးနှုန်းက မိုးထိုးနေပြီ။ ကျနော့်အလုပ်မှာဆိုလည်း ပစ္စည်းစျေးက ခုန်တက်သွားတယ်။လူတွေက စားဝတ်နေရေးကိုပဲ အဓိကဖြေရှင်းနေရတော့ ကျန်တဲ့ဘက်ကို မလှည့်ကြည့်နိုင်တော့ဘူး။ နောက်ပြီး လုပ်အားခ တိုးပေးဖို့ကလည်း အလုပ်ရှင်ဘက်က အဆင်မပြေဘူး။ စီးပွားရေးကတစ်ခုနဲ့တစ်ခု ဆက်စပ်နေတော့ အကုန်စုတ်ပြတ်သတ်နေပြီ။

မေး – နိုင်ငံရေးအခြေအနေကို ဘယ်လိုမျိုးဖြစ်စေချင်လည်း။
ဖြေ – ရှင်းရှင်းပြောရရင် စစ်တပ်အာဏာရှင်တွေ အကုန်အမြစ်ပြတ်သွား စေချင်တယ်။ အဲဒါဆို ပြီးသွားပြီဗျ။ ကျနော်တို့နိုင်ငံကြီး အရင်လို ပျော်ပျော်ရွင်ရွင် ပွဲလမ်းသဘင်တွေ ကျင်းပလို့ရပြီ။ နောက်ပြီး သူငယ်ချင်းတွေလည်း စုံစုံလင်လင်ပြန်ဖြစ်ချင်ပြီ။ မင်းအောင်လှိုင်စစ်တပ် ရှိနေသရွေ့ကတော့ ဘာပျော်စရာမှမရှိတော့ပါဘူး။

• လူထုအသံ
• အင်တာဗျူး
• အမြင်