သွေးပေါင်ကျခြင်းနှင့် အိမ်တွင်းကုထုံး
သွေးပေါင်ကျခြင်းနှင့် အိမ်တွင်းကုထုံး
သွေးပေါင်ကျတယ်ဆိုတဲ့ စကားကို နေရာအနှံ ကြားရလေ့ရှိပါတယ်။ သွေးပေါင်တက်တာ(သို့) သွေးတက်တာကမှ လူကို အန္တရာယ်ဖြေစေနိုင်တာမဟုတ်ပါဘူး။ သွေးပေါင်ကျတာကလည်း အသက်အန္တရာယ်ရှိပါတယ်။
■ သွေးပေါင်ကျတာနဲ့သွေးအားနည်းတာက အတူတူပဲလား
- အဖြေကတော့ မတူပါဘူး။
- သွေးပေါင်ကျတယ်ဆိုတာ ယျေဘုယျအနေနဲ့ အပေါ်သွေး ၉၀၊ အောက်သွေး ၆၀ အောက်ရှိနေတာကို ဆိုလိုတာပါ။
- သွေးအားနည်းတယ်ဆိုတာက သွေးနီဥအားနည်းတာဖြစ်ပါတယ်။
- နှစ်ခုစလုံးကတော့ ကျန်းမာရေးအတွက် ကောင်းတဲ့လက္ခဏာတွေမဟုတ်ပါဘူး။
■ သွေးပေါင်ကျရင်ဘာတွေဖြစ်တတ်သလဲ
- သွေးပေါင်ကျရင် ခေါင်းမူးမယ်
- အသက်ရှုတာ ပုံမှန်ထက်မြန်လာမယ်
- အသက်ကြီးသူတွေနဲ့ နာတာရှည်ရောဂါသည်တွေအဖို့ သတိလစ်တဲ့အထိဖြစ်သွားနိုင်တယ်
- အမြင်အာရုံများဝေဝါးလာနိုင်တယ်
- လည်ပင်းထဲမှာခြောက်ကပ်လာပြီး ရေငတ်လာသလို ခံစားရနိုင်တယ်
■ သွေးပေါင်ကျစေတဲ့ အကြောင်းရင်းတွေ
- ကိုယ်ဝန်ရှိနေတာ
- နှလုံးရောဂါအခံရှိနေတာ
- ဆီးချိုရောဂါရှိနေတာ
- ဆေးမှားသောက်မိတာ၊
- ဓာတ်မတည့်တဲ့ အစားအစာတွေကို စားမိတာ
- ပြင်ပဒဏ်ရာတစ်ခုခုကြောင့် သွေးထွက်များရာကနေလည်း သွေးပေါင်ကျတတ်ပါတယ်။
■ သွေးပေါင်ကျတာရဲ့နောက်ဆက်တွဲအနေနဲ့ ဘာတွေဖြစ်နိုင်သလဲ
- သွေးပေါင် မကြာခဏကျတတ်သူတွေဟာ နောက်ဆက်တွဲအနေနဲ့ ရုတ်တရက်သတိလစ်တာ၊ ရုတ်တရက်နှလုံးရပ်တာ၊ လေဖြတ်တာတွေဖြစ်နိုင်ပါတယ်။
■ သွေးပေါင်ကျသူကို ဘယ်လို ပြုစုပေးရမလဲ
- သွေးပေါင်ကျသူကို အိပ်ရာထဲမှာ အသာလှဲနေခိုင်းတာကအကောင်းဆုံးဖြစ်ပါတယ်
- အိပ်ရာမှာအနားယူခိုင်းပြီး ဓာတ်ဆားရည်တိုက်ပေးတာ၊ ရေတိုက်ပေးတာတွေ လုပ်ပေးနိုင်ပါတယ်။
- သွေးပေါင်ကျတာကို အမြန်သက်သာစေဖို့ ကြက်ဥပြုတ်၊ ဘဲဥပြုတ်တွေကိုလည်း ကျွေးနိုင်ပါတယ်
- သွေးပေါင်ကျသူတွေကို ပြုစုတဲ့နေရာမှာ ရေဓာတ်မခမ်းဖို့အထူးသတိထားရမှာဖြစ်တဲ့အတွက် ရေကိုများများ တိုက်ပေးဖို့လိုအပ်သလို အရည်ဓာတ်ပါတဲ့ အသီးအနှံတွေကိုလည်း ဖျော်ပြီး တိုက်နိုင်ပါတယ်။
- တကယ်လို့ အိပ်ရာထဲမှာနားနေရင်းနဲ့ ခေါင်းမူး၊ ရင်တုန်သေးတယ်ဆို နီးစပ်ရာဆေးရုံ၊ဆေးခန်းကို အမြန်ဆုံးသွားသင့်ပါတယ်။
■ သွေးပေါင်ကျသူတွေအနေနဲ့ ဘာတွေစားသင့်လဲ
- ဗီတာမင် B12 ကြွယ်ဝတဲ့ ကြက်ဥ၊ ဘဲဥတွေကို စားပေးသင့်ပါတယ်။
- သံဓာတ်ပါသောအစားအစာတွေဖြစ်တဲ့ မုန်လာဥနီ၊ ဟင်းနုနွယ်ရွက်တို့ကိုလည်း မကြာမကြာစားပေးသင့်ပါတယ်။
- အထူးသဖြင့် ရေဓာတ်မခမ်းစေဖို့ ရေကိုပုံမှန်သောက်ပေးဖို့လိုအပ်လှပါတယ်။
- မကြာခဏဓာတ်ဆားသောက်ပေးသင့်ပါတယ်။
- သွေးပေါင်မကျစေဖို့ အာဟာရပြည့်ဝနေဖို့လည်း လိုတာမို့ အစာကိုပုံမှန်စားပေးဖို့လိုအပ်ပါတယ်။ အလားတူ အိပ်ရေး၀၀အိပ်စက်ဖို့လည်း လိုအပ်လှပါတယ်။
- သွေးပေါင်ကျသူတွေအနေနဲ့ အလုပ်သင့်ဆုံးသောအချက်
- မကြာခဏသွေးပေါင်ကျတတ်သူတွေအနေနဲ့ သွေးပေါင်ကျခြင်းအကြောင်းရင်းကို သိထားရအောင် နီးစပ်ရာ ဆေးပညာရှင်နဲ့ တိုင်ပင်ဆွေးနွေးထားသင့်ပါတယ်
PKN
(ဆောင်းပါးရှင် PKN ဟာ တိုင်းရင်းဆေးတက္ကသိုလ်က ( B.M.T.M) ဘွဲ့ရ တိုင်းရင်းဆေးဆရာတစ်ဦးဖြစ်ပါတယ်။)
The Tanintharyi Times