ကံပေါက်ဒေသခံ အမျိုးသမီး၅ ဦးထပ်မံဖမ်းဆီးခံရ၊ နှစ်ပတ်ကျော်အတွင်း ပြန်လွတ်လာသူအပါအဝင် အဖမ်းခံရသူ ၃၀ နီးပါးရှိပြီ
ကံပေါက်ဒေသခံ အမျိုးသမီး၅ ဦးထပ်မံဖမ်းဆီးခံရ၊ နှစ်ပတ်ကျော်အတွင်း ပြန်လွတ်လာသူအပါအဝင် အဖမ်းခံရသူ ၃၀ နီးပါးရှိပြီ
စစ်ကောင်စီရေတပ်က ရေဖြူမြို့နယ်၊ ကံပေါက်ဒေသခံအမျိုးသမီး ၅ ဦးကို မနေ့ကမနက်ပိုင်းမှာ ထပ်မံဖမ်းဆီးခဲ့တယ်လို့ ဒေသခံတွေကပြောပါတယ်။
ဖမ်းဆီးခံရသူတွေကတော့ မချိုအောင်၊ မမီးသန်းကြွယ်၊ မမာဝေ၊ မသန်းစိုး နဲ့ မရွက်နုဝေ တို့ဖြစ်ကြတယ်လို့ သိရပါတယ်။
သူတို့ရဲ့အိမ်တွေကို လွန်ခဲ့တဲ့ သုံးရက်၊ အခုလ ၉ရက်နေ့ ညသန်းခေါင်ကျော် ၁နာရီလောက်မှာရေတပ်က စစ်ကား ၅စီးခန့်နဲ့ လာရောက်ပြီး ဝင်ရောက်စစ်ဆေးကာ ဖုန်းတွေကိုယူဆောင်သွားခဲ့ပါတယ်။
မနက်ပိုင်းမှာ ရဲစခန်းကိုလာရောက်ဖို့ ခေါ်ယူခဲ့တာကြောင့် သွားရောက်ချိန်မှာ အဆိုပါအမျိုးသမီးအားလုံးကို ဖမ်းဆီးလိုက်တာပဲ ဖြစ်ပါတယ်။
“မနေ့ကမနက် ၈ နာရီလောက်ရဲစခန်းလာဖို့ခေါ်လို့သွားကြတာကို တခါတည်း ရေတပ်ကိုဖမ်းခေါ်သွားကြတယ်။ ဖမ်းခံနေရတဲ့သူတွေက ဆက်စပ်နေတဲ့ ဆွေမျိုးသားချင်းတွေချည်းပဲ။ ဒီနားတဝိုက်ကိုပဲပတ်ရမ်းနေတာမျိုးပါ” လို့ဒေသခံတစ်ဦးက ပြောပါတယ်။
အခုလ ၄ ရက်နေ့ညသန်းခေါင်ကျော်က ဖမ်းဆီးခံခဲ့ရတဲ့ မမီးသက်၊ မအသေးလေးနဲ့ ၅ရက်နေ့ မနက်ပိုင်းမှာ ဖမ်းဆီးခံရတဲ့ ကိုသက်ဦးတို့ ၃ ဦးလည်း အခုအချိန်ထိ ပြန်လည်လွတ်မြောက်လာတာ မရှိသေးပါဘူး။
ကံပေါက်ဒေသမှာ ပြီးခဲ့တဲ့လ ၂၅ရက်ကစပြီး လက်ရှိအချိန်ထိ ပြန်လွတ်လာသူအပါအဝင် ဒေသခံစုစုပေါင်း ၃၀ ဝန်းကျင်ကို စစ်ကောင်စီရေတပ်က ဖမ်းဆီးခဲ့ပါတယ်။
The Tanintharyi Times