NUG ကာကွယ်ရေးဝန်ကြီးဌာနနဲ့ CDM စစ်သား တွေ ပါဝင်တဲ့ PSPT အဖွဲ့တို့ ပူးပေါင်းပြီး လက်နက်ထုတ်လုပ်

NUG ရဲ့ ကာကွယ်ရေးဝန်ကြီးဌာနက ပြည်သူ့စစ်သားစစ်လက်နက်ထုတ်လုပ်ရေးအဖွဲ့ (PSPT) နဲ့ စစ်လက်နက်ပစ္စည်းထုတ်လုပ်ရေး ပူးပေါင်းလုပ်ကိုင်နေတယ်လို့ ဒီကနေ့ သတင်းထုတ်ပြန်လာပါတယ်။

ပြည်သူ့စစ်သားစစ်လက်နက်ထုတ်လုပ်ရေးအဖွဲ့ (PSPT)ဆိုတာ ပြည်သူ့ဘက်ရပ်တည်လာတဲ့ CDM စစ်သားတွေ၊ ရဲသားတွေ ဦးစီးပါဝင်တဲ့ အဖွဲ့အစည်းတစ်ခုဖြစ်ပါတယ်။

PSPT က စစ်လက်နက်ပစ္စည်းထုတ်လုပ်ရေး အပြင်၊ ပြင်ဆင်ထောက်ပံ့ရေးလုပ်ငန်းတွေကို ပါ ပူးပေါင်းလုပ်ကိုင်နေတာလို့ NUGက ဆိုပါတယ်။

အဆိုပါ အဖွဲ့ဟာ မန္တလေးအခြေစိုက် ပြည်သူ့ကာကွယ်ရေးအဖွဲ့ PDRF ကို RPG -2 တစ်လက် ပြီးခဲ့တဲ့ နိုဝင်ဘာလက ထောက်ပံ့ပေးခဲ့သလို၊ အလယ်ပိုင်းတိုင်းစစ်ဌာနချုပ်၊ ပြည်သူ့ကာကွယ်ရေးတပ် (၁၀၀၉) တပ်ရင်းကိုလည်း 107 MM ကို ပေးခဲ့ပါတယ်။ ဒါကြောင့် တပ်ရင်းကအခုလ ၂ ရက်နေ့မှာ ကျေးဇူးတင်သဝဏ်လွှာ တစ်​စောင် ပေးပို့ခဲ့တာ တွေ့ရပါတယ်။

NUG ကာကွယ်ရေးဝန်ကြီးဌာနရဲ့ ထုတ်ပြန်ချက်အရ CDM စစ်သားတွေနဲ့ ရဲသားတွေဟာ ပြည်သူ့ကာကွယ်ရေးတပ်မတော်(PDF) တွေမှာ စစ်လက်နက်ပစ္စည်းတွေ ထုတ်လုပ်ရေးအပြင် တိုက်ခိုက်ရေးနဲ့ လေ့ကျင့်ရေး လုပ်ငန်းတွေကိုပါ ပါဝင်လုပ်ကိုင်ဆောင်ရွက်နေကြပြီလို့ ဆိုပါတယ်။

ပြည်သူ့ဘက်ရပ်တည်လာမဲ့သူတွေကို ဆက်လက်ကြိုဆိုနေပြီး ပြည်သူ့ဘက်အမြန်ဆုံးရပ်တည်ဖို့ (သို့) အမာခံသတင်းပေးတွေအဖြစ် ရပ်တည်ဖို့ NUGရဲ့ ကာကွယ်ရေးဝန်ကြီးဌာနက တိုက်တွန်းထားပါတယ်။

The Tanintharyi Times

• ပြည်တွင်း
• သတင်း